Pigkokonsederar ni Presidente Ferdinand R. Marcos Jr. na dakulang problema kan nasyon an online gambling, apwera pa sa nagdadakol na mga online scam gamit an artificial intelligence asin digital currency.
Sigun sa Presidente padagos na naggigibo nin paagi an gobierno tanganing proteheran an mga Pilipino kontra sa mga sindikatong nagkikita sa panloloko.
Kabali na digde an pagpapautob kan Anti-Financial Account Scamming Act, pagtatatag kan E-Commerce Bureau para sa reklamo asin tabang online siringman an pagpapautob kan SIM Registration Act tanganing malikayan an mga pekeng transaksyon.
Kaibahan na man sa mga lakdang kan gobierno an pagtatao nin pagsasanay sa mga Pilipino para sa mga bagong trabaho sa AI, cybersecurity, asin e-commerce.
Komo enot na kasimbagan sa nagdadakulang isyu kan online sugal, ipinauntok na kan gobierno an access sa pirang mobile apps asin websites na ginagamit sa sugal tanganing maproteheran an publiko asin an sistema kan pananalapi sa Pilipinas.
