Piglalaoman an pagbaba sa presyo kan bagas sa katahawan kan bulan nin Oktubre sa presenteng taon.
Pig-apod ini ni DA Sec. Francisco Tiu Laurel komo soboot saiyang “fearless forecast”.
Paliwanag man kan sekretaryo na nauubos na an mga naenot na stock kan bagas na halangkaw an presyo asin mariribayan nin mas baratong mga bagong stock.
Pighalimbawa pa ni Laurel na enkaso ngunyan nasa P50 kada kilo an presyo kan bagas, piglalaoman na mababa na ini sa P45 kada kilo sa masunod na bulan.
Sa pagdangog kan Senado, pigsaysay ni Sec. Laurel na mamatean an full effect kaini sa papaabuton na bulan kan Enero 2025.
Marurumdumang enot ng pig-report kan Philippine Statistics Authority na nagbaba an presyo kan bagas na nagresulta sa mas maluya na inflation rate kan nasyon na nasa 1.9% kan nakalihis na bulan kan Setyembre.
