Pinalangkaw kan National Food Authority (NFA) an presyo kan paroy sa Bicol Region para matabangan an mga paraoma, orog na sa panahon nin tig-init, dawa ngani pinapahiwas kan ahensya an kapasidad kan mga bodega para sa mas dakulang procurement kan anihon.
Sa isinagibong privilege ni Julie B. Llenaresas, Asst. Regiopnal Manager, NFA Region V, sinabi kaini na haros bilog na procurement team an nakadeploy na sa rehiyon ngonian na harvest season ngani na makabakal nin paroy asin madagdagan an buffer stocks na pwedeng magamit sa panahon nin calamidad asin emerhensya.
An presyo kan NFA para sa malinig asin tuyong bagas sa Albay, Camarines Sur asin Camarines Norte ₱28 kada kilo, mantang ₱27 kada kilo sa Catanduanes, Sorsogon asin Masbate.
Segun sa ahensya, posibleng maglangkaw an presyo depende sa sitwasyon kan merkado.
Paliwanag kan NFA, dakulang tabang ini sa mga paraoma na apektado kan tag-uran, kun kaya pig-eenkaminar an mga ini na padagos na maghatod kan saindang produkto sa ahensya.
Sa ngonian, an NFA igwa nin 15 nakalista na mga bodega sa bilog na rehiyon, asin nagpapadagos pa an paglista asin pagpreparar nin dugang na mga bodega tanganing maasikaso an mas dakulang volume kan bagas.
An pinakadakulang kapasidad nakakonsentrar sa Camarines Sur, midbid bilang rice granary kan Rehiyon Bikol, na may walong darakulang bodega. Apwera sa mga bagong lininig asin inandam na pasilidad iyo an Bicol Oil Warehouses 1, 2 asin 3 sa Pasacao.
Segun sa NFA, iguang pondo hale sa Central Office para sa procurement. An Department of Agriculture (DA) pwede man mag-alokar nin ₱5 billion para sa pagbakal nin bagas sa bilog na nasyon kun maubos na an presenteng procurement fund.
Tinawang-duon kan ahensya na igwa pa sindang andam na pondo para sa pagbakal kan ani kan mga paraoma.
