Makalihis ibusol an pagpapababa kan presyo nin bagas, tinawan-duon ni Speaker Ferdinand Martin G. Romualdez na dapat tutukan man an presyo kan gulay tanganing masierto an abot-kayang presyo kaini katakod kan pagsierto na dae ini ikalulugi kan mga paraoma.
Sigun ki Romualdez, “Bako sana bagas an dapat tang tutukan—paano man an gulay? Urualdaw na pangangaipohan ini kan lambang pamilyang Pilipino. Kaipohan tang siertohon na igwa nin bastante, abot-kaya, asin masustansiyang pagkakan sa hapag-kainan kan lambang Pilipino,”
Basado sa datos kan Philippine Statistics Authority (PSA), akyat-baba an presyo kan gulay sa nasyon.
Kan Pebrero 2025, an average retail price kan kamatis nagbaba sa P109.94 kada kilo gikan sa P158.67 na naikurit kan Enero.
Naglangkaw man an presyo kan pulang sibulyas na nasa P162.69 kada kilo gikan sa P153.70, asin an kalamansi na nasa P86.63 kada kilo gikan sa P81.61.
Kabali sa mga kawsa kan halangkaw na presyo kan gulay, sigun ki Romualdez an kakulangan kan agricultural infrastructure, farm-to-market transport, asin mga post-harvest facility.
