Aram baya nindo mga ka-bombo, nadiskubre kan sarong lokal sa Solana, Cagayan an primerong fossil kan stegodon skull sa Pilipinas.
Iniladawan ini kan mga paleontologist gikan sa UP Diliman asin University of Wollongong sa Australia komo sarong napakabihirang hayop na kaparientes kan modernong elepante.
Sinda Meyrick Tablizo, Dr. Allan Gil Fernando (UPD-CS NIGS), asin Dr. Gerrit van den Bergh an nagsagibo nin pag-aadal sa fossil na pigkakarkulong milyon-milyong taon na.
Bihira an siring na fossil huli ta madali na maraot an bungo antes pa ini magin fossil. Kadalasan, ngipon asin man pangil sana an nanunutaran.
An nadiskubreng skull an igwa pa nin buong ngipon asin duwang sadit na pangil dawa na ini durog asin deformed. Pinagtutubudang “teenager” pa an stegodon na ini, bahagyang mas halangkaw sa karaniwang Pilipino.
SIgun sa mga eksperto, makukusog sindang lumangoy asin man nakakatawid nin dagat dawa na mayong land bridges.
An skull an nagtatao nin impormasyon kun saen gikan an hayop asin pano ini nakaabot sa Pilipinas. Igwa nin tulong klase nin stegodon sa Luzon: dakula, sadit (dwarfed), asin intermediate.
Pagirumdom sa Publiko kun igwa nin manutarang fossil, makipag-koordinar sa Nannoworks Lab, Paleontological Society of the Philippines, o National Museum tangani ini pakarhay na mapag-adalan asin mapreserba.
An saindang pag-aadal an inilathala sa journal na Palaeogeography, Palaeoclimatology, Palaeoecology.
