Pig-asegurar kan Police Regional Office 5 (PRO-5) an mas halangkaw na seguridad para sa maabot na Peñafrancia Festival sa Ciudad nin Naga, kabale na an pagdeploy nin 2,500 na augmented police personnel sa manlaen-laen na parte kan ciudad.
Sa paghamapang sa mga kagawad kan media ni PRO-5 Regional Director PBGen. Randy Glenn Silvio, sinaysay kaini na igwa man nin 150 personnel bilang contingency force para sa anuman na insidente na pwedeng mangyari.
Duwang aldaw antes an mayor na aktibidad, magsasagibo nin security operations an mga pulis sa banggi ngani na masierto an seguridad sa mga lugar kun sain gigibuhon an mga aktibidad. An mga CCTV camera na inutang sa Camp Crame asin Starlink internet connection gagamiton man para sa drone operations asin monitoring sa bilog na selebrasyon.
Papakusugon man an command asin superbisyon sa kada sektor sa paagi kan pag-assign kan mga senior officers asin supervisors hali sa PRO-5 headquarters. Bako sana an Naga City Police Office an maasikaso sa seguridad nin huli ta handa man na magtabang an bilog na PRO-5 staff asin National Support Units.
Pigsierto ni Silvio na fully equipped an lambang security team, kabale na an mga imbestigador, arresting personnel, medics, intelligence operatives, human rights personnel asin drone operators, sa pagresponde sa anuman na insidente. Piglalaoman na maabot an mga augmented personnel saro hasta duwang aldaw bago an mga mayor na aktibidad.
Mientrastanto, ipapadara man an mga intelligence operatives sa mga importanteng instalasyon asin mga hotel para mas marikas na mabisto asin magresponde sa anuman na huma sa seguridad. Sinabi ni Silvio na rerepasohon an security plan pagkatapos kan selebrasyon tanganing maaraman an mga nanodan asin mga improvements para sa mga maabot na Peñafrancia Festivals.
