Aminado an saro sa mga opisyal kan lokal na gobierno kan Maynila na nabigo an mga service provider na MetroWaste Solid Management Corp. asin Philippine Ecology Systems Corp. (PhilCo) na masimbagan an pigpirmahan na kontrata na nagkakantidad nin P842.7 milyon para sa paghahakot nin basura sa Maynila huli sa kakulangan kan saindang mga personahes.
Sigun ki Manila Department of Public Service (DPS) Officer-in-Charge Jonathan Garzo, sa ibong kaini, padagos nindang paglalapigotan na makatabang sa paghahakot kan basura asin malinig an mga pangenot na tinampo sa tabang kan saindang mga street sweepers na amay pa sana an naka-deploy na sa tinampo.
Naenot naman sinaysay kan DPS na dae ninda kayang balikatin an problema sa basura sa siyudad nin huli sa kakulangan kan mga trak na panghakot kaya kadakol nin lugar sa Manila an naipon an dae nahahakot na basura.
Huli digdi, nagpasaklolo na an gobierno kan siyudad nin Maynila sa Metropolitan Manila Development Authority (MMDA) tanganing mahakot an natambak na basura sa kadakol na lugar sa siyudad.
