NAGA CITY- Isasagibo an programang test weights sa Ocampo Public Market sa banwaan kan Ocampo, Camarines Sur.
Sa entrevista kan Bombo Radyo Naga ki Eduardo S. Jallores Jr, Designated Market Administrator sa Ocampo Public Market, sinaysay kaini na igwang pigtalaan na budget an lokal na gobierno kan Ocampo para sa pagbakal kan nasambitan ng test weights.
Sigun ki Jallores, obheto kan pagkakaigwa kan test weights an tanganing ma-calibrate an mga timbangan na ginagamit kan mga paratienda asin malikayan an anuman na klase kan dayaaan.
Dugang pa kan opisyal sa bilog na Camarines Sur, pira lang na merkado an igwa kaini kun kaya piglalapigutan soboot kan saindang lado na magkaigwa na kan test weights.
Katakod digde, pigsierto man ni Jallores na ngunyan na taon tatapuson an programang ini maski pa igwang kamahalan an presyo.
Mientranto, liwat man na pig-abisuhan kan opisyal an mga paratienda sa Public Market kan Ocampo na likayan an paggamit kan madayang timbangan tanganing dae man mahalian nin permit asin mabugtak sa alanganin na sitwasyon.
Sa ngunyan, maogma man na pigheras kaini na mayo man nagbabalgar na paratienda sa mga panundunan na piglatag kan saindang lado.
