NAGA CITY- Aminado ngonyan an lado ni Vice President Leni Robredo na igwa nin mga pagkakataon na naglalawig an proseso kan nagpapadagos na manual recount kan Presidential Electoral Tribunal (PET) huli naman sa debate manungod sa 50 percent threshold sa shading kan balota sa May 2016 elections.
Sa entrevista kan Bombo Radyo Naga ki Georgina Hernandez, tagapagtaram kan bise presidente, sinaysay kaini na nagpapadagos pa hasta sa ngonyan an pigkokondusir na recount kan mga balota hale sa probinsya nin Camarines Sur asin tulos man na isusunod digdi an mga balota hale sa Iloilo katakod kan electoral protest na pigsangat ni dating Sen. Bongbong Marcos laban sa opisyal.
Dae pa ninda masierto kun nuarin posibleng matatapos an recount kan balota sa Camarines Sur urog pa ta igwa suboot mga pagkakataon na nagdedebate an mga revisors kun laog sa 50 percent threshold an shading kan pigbibilang na balota.
Sa ngonyan, sigon ki Hernandez, padagos pa nindang pighahalat an magigin desisyon kan PET sa saindang pigsunad na motion for reconsideration para ipautob an enot na direktiba kan Commission on Elections (Comelec) na 25 percent threshold sa shading kan balota sa May 2016 elections.
Pagkaklaro man kan lado ni Robredo na mayo pang opisyal asin partial na numero an pigsasapubliko kan PET manungod sa nagpapadagos na manual recount.
