Nagsunad nin prosopwestong ley si Paranaque 2nd District Representative Brian Raymund Yamsuan tanganing labanan an paglakop kan artificial intelligence (AI)-generated fraud sa paagi kan mahigot na implementasyon na regulasyon sa paggamit kan deepfakes.
Pig-enkaminar kan Paranaque solon sa Kongreso ipasar an House Bill (HB) 3214 na obhetong protehiran an mga Filipino gikan sa AI-generated deepfakes na pwedeng gamiton tanganing linlangon an publiko, rauton an mga reputasyon, magpanggap komo mga indibidwal asin maski na iladawan an mga tawo asin an non-consensual sexual content, pwede man ining gamiton tanganing maniobrahon an pampulitikang diskurso, asin mag-udyok pa nin poot o kadahasan.
Sinaysay pa kan Kongresista na panahon na tanganing magkaigwa nin matibay na ley kontra sa mga deepfakes na an pakay iyo an mang-scam nin kapwa, mangraot, o magpalakop nin fake news.
Sa irarom kan HB 3214 o an pigsuhestiyon na Deepfake Regulation Act, an lambang Pilipino an dapat magkaigwa nin likas na derechos sa sadiring pagkakahawig, kaibahan an lawgon, lawas asin boses na dae nangangaipuhan nin enot na pagpaparehistro para sa trademark o proteksiyon sa copyright.
Pigpo-protehiran man kan HB 3214 an sisay man na tawo na an pagkakahawig an ginamit nin mayong pagtugot sa sarong deepfake sa paagi kan pagkakaigwa nin karapatang maghagad nin paghali kan dae otorisadong laog gikan sa platform kun saen ini naka-host.
Dapat magsunod man an platform sa kahagadan sa paghali sa laog nin 48 oras puon kan maresebir an napatotoohang reklamo.
An sisay man na tawo o platform na mapapatotoohang tuyong naggibi, nagheras o magsayumang maghali kan deepfake na content makalihis kan valid na notice, papadusahan nin pagkakakulong puon duwa hasta limang taon asin multang puon P50,000 hasta P200,000.
An mga online platform na dae magsunod sa mga kahagadan sa paghali sa laog kan 48 oras an pagmumultahon nin P50,000 lambang aldaw kan dae pagsunod sa irarom kan prosopwestong ley.
