NAGA CITY – Nagpapadagos an pigkokondusir na preparasyon kan manlaen-laeng ahensya kan lokal na gobierno kan Naga para sa magigin selebrasyon kan Penafrancia Fiesta ngunyan na taon.
Sa nagin patara-tara ni Renne Gumba, pamayo kan Public Safety Office, sinaysay kaini na igwa sinda nin mga task force na matabang sa pagmantinir kan katuninungan asin kasalbaduhan kan lambang bisita asin residentes sa oras kan kasiributan sa enterong syudad.
Igwa sinda nin task force for public safety; traffic management and traffic information; asin joint task group para sa health and medical magin utilities.
Yaon man an fluvial task group na gagampanan man kan mga personahes kan Philippine Coast Guard; Security and peace and order task group na pamamayuhan man kan Naga City Police Office asin iba pang mga uniformed personnel.
An nasambitan naman na mga task group an magseserbing mga first responders sa oras kan katibaadan sa oras kan mga aktibidad katakod kan Penafrancia Fiesta.
Nagpaabot man nin pasasalamat an opisyal sa gabos na mga ahensya kan national government na magheheras nin tabang sa pagsierto kan katuninungan sa Naga sa oras kan nasambitan ng selebrasyon.
