Pinapalikay ngunyan kan Department of Migrant Workers (DMW) an labi 70,000 na mga pekeng job postings na nagkukuriyat sa social media platforms.
Kun saen pighali kan ahensya an mga nasambitan ng numero kan mga naglipang mga fake job postings sa manlaen-laen na platform sa social media siring kan Facebook asin TikTok tanganing protekteran an mga Pilipino gikan sa mga mapanlinlang na alok nin trabaho asin mga mapagsamantalang illegal recruiters na nag-aalok nin pekeng trabaho sa ibang nasyon.
Sa kabilogang numero igwa nin 71,653 na pekeng job posts an tinanggal kan DMW, kabali na an 50,220 sa Facebook asin 21,433 man sa TikTok.
Kadalasan soboot an mga pekeng post na ini pigluluwas kan mga mayong hirak na tawo na nagpapamalong lehitimong mga recruitment agency, na minsan pa soboot pigkokopya an opisyal na mga pahina kan mga DMW-licensed agencies tanganing linlangon an mga aplikante kaini. Komo kasimbagan, an DMW, nakikipagtabangan sa Facebook asin TikTok tanganing tulos halion an mga pekeng account na ini.
Pig-enkaminar ni Migrant Workers Secretary Hans Leo Cacdac an mga Pilipinong naghahanap nin trabaho na maging maingat asin siertohon an pagigin lehitimo kan mga alok na trabaho sa manlaen-laen na mga recruitment agencies. Dugang pa kaini na pwedeng i-verify kan mga aplikante an lehitimong mga recruitment agencies sa paagi kan opisyal na website kan DMW.
