(UPDATE) NAGA CITY- Binisto na ngonyan an pulis na binawian nin buhay makalihis an nangyaring pananambang kan mga armadong kalalakihan na nangyari sa banwaan nin Labo, Camarines Norte.
Sa impormasyon na naresibe kan Bombo Radyo Naga hale ki PS/Insp. Malu Calubaquib, tagapagtaram kan Police Regional Office (PRO) 5, binisto an nagadan na pulis na si PO2 Richard Abad mantang irido man sinda PO2 Ronald Gutierrez; PO2 Ericson De Vera; PO1 Jeffrey Tarrobago; PO1 Pedro Valeros; PO1 Romar Umandap asin PO1 Johnson Espaṅa na gabos miyembro kan Camarines Norte Provincial Mobile Force Company (CNPMFC) kan Camarines Norte Police Provincial Office (CNPPO).
Nagpapadagos suboot ngonyan an pigkokondusir na hot pursuit operation kan mga otoridad na pinangengenotan kan mismong force commander kan CNPMFC na si P/Supt. Elmer Mora katabang an mga soldados hale sa Philippine Army para lapagon an nagdulag na mga rebeldeng New People’s Army (NPA).
Marurumduman na tinambangan kan pigtutubudang mga NPA an duwang police mobile na nilulunadan kan mga biktima sa parte kan barangay Daguit subagong ala-1 nin mag-uumagahon.
Enot kaini, sinaysay ni SPO1 Sheralyn Samonte hale sa CNPPO na nagkondusir nin internal security operation an nasambitang mga pulis sa banwaan nin Labo asin pabalik na kuta na an mga ini sa provincial command kan pauranan an mga ini nin bala kan mga rebelde.
