NAGA CITY- Tinawan doon ngonyan kan sarong blogger asin pageant enthusiast na dae dapat na itakod an pulitika makalihis na dae makalaog sa top 5 sa Miss Universe 2017 si Rachel Peters.
Sa entrevista kan Bombo Radyo Naga ki Arvin Cabachete, blogger asin pageant enthusiast, sinaysay kaini na ‘proud’ pa nanggad sinda sa trayumpo asin ipinahiling na tibay ni Bb. Pilipinas-Universe Rachel Peters sa nasambitang kompetisyon.
Mayong anumang dugta suboot nin pulitika sa nasambitang pageant huli ta dae man aram kan mga judges asin kan ibang tao na sarong pulitiko an kailusyon ni Peters na si Camarines Sur Gov. Migz Villafuerte.
Dae man suboot nakaapektar sa beauty pageant an binutasan na pahayag kan daraga manungod sa nagkapirang mga isyu asin pangyayari sa nasyon.
Ini an simbag ni Cabachete makalihis na pansinon kan nagkapirang mga netizens si Peters huli sa enot kaining pahayag na dapat na tawan suboot nin pagkakataon si Presidential Communications Operations Office (PCOO) ASec. Mocha Uson siring man an relasyon kan beauty queen sa gobernador kan Camarines Sur.
Mientrastanto, saro man sa pighihiling ngonyan ni Cabachete na rason tano dae nakalaog sa top 5 si Peters huli sa kawaran suboot kaini nin naipahiling na “women empowerment” na saro man sa pigbasehan sa pagpili nin Miss Universe 2017.
Pigklaro man ni Cabachete na saro sana si Miss Universe 2015 Pia Wurtzbach sa mga judges kaya dae man suboot maninigo na basulon ini sa dae pagkakalaog ni Peters sa top 5 finalist kan Miss Universe 2017.
