NAGA CITY- Labi an pagpapasalamat kan journalist na si Pia Ranada huli sa suportang padagos na pigpapahiling kan Malacañang Press Corps (MPC) sa saiya.
Sa ekslusibong entrevista kan Bombo Radyo Naga ki Ranada na reporter kan online news agency na Rappler, sinaysay kaini na nagpapasalamat siya sa suporta na pigtatao sa saiya kan MPC.
Ikinaugma niya na pigkokonsiderar pa nanggad siyang miyembro kan organisasyon sa ibong kan pag-revoke kan Securities and Exchange Commission (SEC) sa license to operate kan Rappler kun saen siya nagtatrabaho.
Enot kaini, tinawan doon kan Malacañang Press Crops na saro ining pribadong organisasyon na dae kontrolado kan gobyerno.
Nagbisita ngonyan na aldaw sa ciudad nin Naga si Ranada makalihis na mag-atendir sa Forum on the State of the Philippine Media and Press Freedom na pinangenotan mismo kan Caceres Communications Commission kan Archdiocese of Caceres.
Marurumduman na nagkapirang semana na an nakakalihis kan dae tugutan na makalaog sa Malakanyang si Ranada asin pigpangalad na mag-cover kan nagkapirang mga pangyayari sa Palasyo basado naman sa kasuguan ni presidente Rodrigo Duterte.
