NAGA CITY– Nakatalaan na punan na an regionwide inspection kan Mines and Geosciences Bureau (MGB) Bicol sa gabos na mga ‘large scale quarry’ operations sa rehiyon.
Ini katakod kan kasuguan ni Environment and Natural Resources Sec. Roy Cimatu na nagpapasuspendir sa gabos na quarry operations sa Pilipinas.
Sa entrevista kan Bombo Radyo Naga ki Engr. Guillermo Molina, Regional Director kan MGB-Bicol, sinaysay kaini na igwa nin walong grupo na makondusir nin inspeksyon sa gabos na large scale quarry sites urog na sa Legazpi City asin Camalig sa Albay asin sa Baao, Camarines Sur.
Pagkatapos kaini, isusunod man suboot an pag-inspeksyon sa mga sand and gravel quarry sites na natawan nin permit kan mga lokal na gobyerno.
Pigbibilog an grupo nin anom na mga kabuhan kabale na an ang geologist, mining engineer, geodetic engineer, forester, representante hale sa Environmental Management Bureau (EMB) asin sa mga Provincial Environment and Natural Resources Office (PENRO).
Obheto suboot kan inspeksyon na maaraman kun igwa nin huma sa mga komunidad asin edifio an operasyon kan mga minahan asin quarry company na posibleng magresulta sa landslides.
Kasabay man suboot sa ikokondusir na inspeksyon an pagtatao kan MGB-Bicol nin cease and desist siring man an suspension order sa mga kompanya na mahaloy nin hasta sa 15 araw.
Ini para matawan dalan suboot an gigibuhong assessment kan ahensya antes ini magdesisyon kun babawion an kasuguan o dagos ng ipapauntok an operasyon kan minahan asin quarry sa lugar.
Sigon ki Molina, sa tabang kan ikokondusir na inspeksyon, masisierto kan ahensya na dae mangyayari sa rehiyon an insidente nin landslides sa Itogon, Benguet asin sa Naga City, Cebu.
