Nakatabang an regular na paglilinig kan Barangay Tabuco, Naga City, sa pag-iwas sa pagdakul kan kaso nin Dengue sa lugar.
Sa intrevista kan Bombo Radyo Naga ki Susana Fabia, Barangay Official, Tabuco, Naga City, sinabi kaini na aktibo an Barangay sa paglilinig kan komunidad asin mga kanal, pati na sa pagtao nin impormasyon sa mga residente sa paagi kan flyers.
Kaiba sa mga lakdang an pag-spray sa mga kanal, na enot nililinig antes isagibo an spraying tanganing mas epektibo an pag-control kan mga lamok.
Sinabi ni Fabia na an kalinigan asin disiplina kan mga residente makakatabang sa pagprotekta sa komunidad laban sa Dengue.
Tig-enkaminar kaini an mga Barangay Official, paratukdo asin mga residente na magkurusa sa tamang pagaapon kan basura asin padagos na paglilinig tanganing mabawasan an mga lugar na posibleng pugaran kan lamok.
