Sinabi ni House Prosecutor Chel Diokno na nasa bawat senator-judge ang pagpapasya kung hahatol ng conviction o acquittal sa isang impeachment case.
Ayon kay Diokno, walang itinakdang legal na pamantayan sa impeachment proceedings tulad ng “reasonable doubt,” “preponderance of evidence,” o “substantial evidence” na karaniwang ginagamit sa iba’t ibang uri ng mga kaso sa hukuman.
Ipinaliwanag niya na ang bawat senador na magsisilbing hukom sa impeachment trial ay may kalayaang timbangin ang mga ebidensya at argumento na ihaharap ng magkabilang panig bago bumuo ng sariling pasya.
Binigyang-diin din ni Diokno na ang desisyon ng bawat senator-judge ay nakabatay sa kanilang sariling pagsusuri sa mga katotohanan at ebidensyang ilalahad sa paglilitis, alinsunod sa kanilang tungkulin sa ilalim ng Konstitusyon.
Patuloy namang inaabangan ng publiko ang mga susunod na hakbang sa impeachment proceedings habang naghahanda ang magkabilang panig para sa pagdinig ng kaso sa Senado.
