Pighurot ni Akbayan Partylist Rep. Chel Diokno na kinakaipuhang magsagibo nin masusing imbestigasyon an Kongreso katakod kan pagkagadan ni dating DPWH Undersecretary Catalina Cabral, kasabay kan mga isyung nagpapatos sa mga anomalya sa infra asin flood control projects.
Sinaysay ni Diokno na nagluluwas sa mga naenot na imbestigasyon na igwang hararom na kaaraman si Cabral bako sana sa mga proyekto kundi magin sa mga kontratista asin soboot mga indibidwal na nasa likod kan mga anomalya.
Pigtawan-duon kan lehislador na dae dapat mabaon an impormasyong ini kasabay kan paglulubong ki Cabral.
Sigun sa saiya, importanteng maaraman bako sana an tunay na rason kan pagkagadan kan dating opisyal kundi pati na an mga impormasyong pwede pang mabunyag gikan sa isasagibong imbestigasyon kan Kongreso.
Pigtututokan man soboot kan mga lehislador an haloy na aksiyon kan gobyerno, kaibahan an ulayan sa mga ari-arian asin ebidensiyang kapot ni Cabral, siring man an mismong proseso kan pag-iimbestigar sa saiyang pagkagadan.
Dugang pa ni Diokno, liwat na pigbubusol an pangapodan para sa pagkakaigwa nin death investigation asin autopsy law tanganing masierto an malinaw asin independiyenteng pag-aadal sa mga kahina-hinalang pagkagadan.
