Isinusulong ni Marikina 2nd District Rep. Miro Quimbo ang agarang pagbuo ng national petroleum reserve at pagpapatibay ng alternatibong mapagkukunan ng enerhiya bilang tugon sa lumalalang krisis sa langis na dulot ng tensyong pandaigdig, kabilang ang digmaan sa Iran.
Ayon kay Quimbo, na siya ring chairperson ng House Committee on Ways and Means, nagsisilbing “wake-up call” ang kasalukuyang krisis para sa Philippines.
Binigyang-diin niya na ang labis na pagdepende ng bansa sa imported na petrolyo ang naglalagay sa ekonomiya sa panganib tuwing may mga geopolitical na tensyon sa ibang bansa.
Kabilang sa mga hakbang na kanyang isinusulong ang agarang pagpapaunlad ng mga lokal na pinagkukunan ng enerhiya tulad ng geothermal at natural gas.
“Kailangan nating i-fast-track itong mga alternative sources of energy na ito dahil dito nakasalalay kung paano tayo makakaligtas o mabubuhay sa krisis na ito,” pahayag ni Quimbo.
Bukod dito, iginiit din ng mambabatas ang kahalagahan ng pagkakaroon ng sariling imbakan ng langis ng pamahalaan upang matiyak ang sapat na suplay at mapanatiling abot-kaya ang presyo nito sa panahon ng emergency.
Umaasa si Quimbo na matatalakay at maaprubahan ang mga panukalang ito bago ang adjournment ng First Regular Session sa unang linggo ng Hunyo.
Ang panawagang ito ay kasunod ng emergency meeting na ipinatawag ni Faustino Bojie Dy III kasama ang 13 chairpersons ng iba’t ibang komite sa Kamara upang bumuo ng nagkakaisa at matatag na tugon ng pamahalaan laban sa patuloy na pagtaas ng presyo ng langis.
