Pigbubusol ni Leyte 1st District Representative Ferdinand Martin Romualdez na maisa-ley an saiyang House Bill 14 o “Crop Insurance Bill”.
Ini makalihis pigbubusol man ni Presidente Ferdinand Marcos Jr., na pahewason pa an crop insurance coverage tanganing protehiran an mga Pilipinong paraoma.
Obheto kan prosopwesto na mapakusog asin mapahewas an serbisyo kan Philippine Crop Insurance Corporation o PCIC, asin magin bukas sa pribadong sektor pag-abot sa agricultural insurance.
Sa oras na magin ganap na ley an House Bill No. 14 an sakop kan PCIC an bako sana sa paroy asin mais, kundi pati an high-value commodities, mga hayop, aquaculture, makinarya, asin post-harvest infrastructure.
Pigtawan-duon ni Rep. Romualdez na an saindang prosopwesto an naaayon sa pagbubusol ni Presidente Ferdinand Marcos Jr na mas protehiram an mga Pilipinong paraoma asin masierto an seguridad sa pagkakan sa nasyon.
Nagtutubod si Romualdez na kun igwang marhay na insurance magkakaigwa nin peace of mind an mga paraoma orog na sa panahon kan kalamidad.
Sigun pa ki Romualdez, importante na magbusol nin reporma tanganing tunay na makinabang an mga saradit na paraoma na karaniwang dae nagkukua nin insurance huli sa kawaran nin bastanteng kaaraman, red-tape, asin maluyang pagbabayad.
Basado sa global data gikan sa Consortium of International Agriculture Research Centers o CGIAR lampas 2.4 milyong paraomang Pinoy an nagtitinir na “vulnerable” gikan sa kalamidad, alagad mayong bastanteng access sa insurance protection.
