Nagkaigwa nin mainit na diskusyon si Kamanggagawa Party-list Representative Elijah “Eli” San Fernando asin Department of Labor and Employment (DOLE) Secretary Francis Tolentino durante kan deliberasyon para sa ipinapanukalang 2027 budget kan ahensya. Nagpoon an tensyon sa isyu kan naantalang pagpapatupad kan dagdag-sahod para sa mga minimum wage earner sa National Capital Region (NCR).
Ipinahayag ni San Fernando na base sa order kan Pasig Regional Trial Court (RTC) Branch 152, magigin epektibo sana an writ of preliminary injunction kun maglalagak nin 10-B bond an mga petitioner. Idinugang kan lehislador na huli ta mayo pang nailalagak na bond an mga kumpanya, mayo nin nag-eeksistir na legal na injunction kaya mayo nin legal na rason an Department of Labor and Employment (DOLE) tagnaning ipauntok an umento sa sahod.
Tinawan -doon pa ni Rep. Eli na segun sa Republic Act No. 6727 o Wage Rationalization Act, an Regional Tripartite Wages and Productivity Boards (RTWPB) an may eksklusibong kapangyarihan sa pagtatakda kan sahod. Malinaw man suboot na ipinagbabawal sa irarom kan nasabing ley an pagpapatupad nin injunction kan mga ordinaryong korte laban sa desisyon kan wage board.
Depensa man ni Sec. Tolentino, an pagsuspinde sa taas-sahod bakong desisyon kan Department of Labor and Employment (DOLE) kundi pagtalima asin pagrespeto sana sa nag-eeksistir na proseso kan ley. Aniya, an Korte Suprema sana an may kapangyarihan na magdesisyon manungod sa legalidad kaini, asin oras na magluwas an halangkaw na hukuman nin kasuguan na ipatupad an umento, tulos man suboot ining susunudon kan ahensya.
Idinugang pa ni Tolentino na naiintindihan kan Department of Labor and Employment (DOLE) an pangangaipo kan mga obrerong Pilipino na makaresibi nin mas halangkaw na sahod sa tahaw kan padagos na paglangkaw kan presyo kan mga barakalon . Nararapat sana suboot na makua kan mga obrero an umentong nararapat para sa sainda.
Ipinaliwanag kan sekretaryo na nagsunand na an ahensya sa paagi kan Office of the Solicitor General (OSG) nin legal na petisyon tanganing kwestyunon an RTC order. Sinusuportahan man suboot kan Department of Labor and Employment (DOLE) an suway na petisyon na isinunad kan mga grupo nin obrero kabali na an Kamanggagawa Party-list sa Korte Suprema tanganing pugulan an Regional Trial Court (RTC) sa pagpapawalang-bisa sa wage order.
Sa pagpadagos kan mainit na diskusyon, idinugang ni San Fernando na mayo nin karapatan an Department of Labor and Employment (DOLE) na maghagad nin pondo para sa taong 2027 kun dai kaini kayang depensaran an karapatan kan mga manggagawa, kaya ipigsuhestyon kaini na isantabi an budget kan ahensya. Alagad, dai naaprubahan an nasabing petisyon matapos makakua sana nin 7 pabor na boto laban sa 31 na nagboto kontra digdi.
