NAGA CITY- Madepende suboot sa ilalatag na ebidensya kan prosecutors siring man sa depensa ni Chief Justice Maria Lourdes Sereno an posibleng magin resulta kan gigibuhong impeachment trial kan Senado kontra sa pamayong mahistrado.
Ini an sinaysay ni Ako Bicol Partylist (AKB) Rep. Rodel Batocabe sa entrevista kan Bombo Radyo Naga.
Segun ki Batocabe, dae pa masierto kun ano an magigin resulta kan impeachment trial kontra ki Sereno huli ta an namamanwaan an mahusgar digdi, depende sa ilalatag na ebidensya kan mga prosecutors kan Kamara siring man an depensa kan lado kan chief justice.
Mientrastanto, aminado man si Batocabe na komo nagin professor niya si Sereno sa University of the Philippines (UP), kan enot, dae siya nagtubod sa mga akusasyon na na isinangat kontra digdi ni Atty. Larry Gadon.
Alagad, kan nadangog niya suboot an mga pahayag kan mga personang nag-atubang sa pagdangog kan House Justice Committee urog na an mga pag-iriba sa Korte Suprema ni Sereno, digdi niya nahiling na igwang problema an pamayong mahistrado asin dae ini mapagkakatiwalaan huli sa pirang beses kaining pag-utik.
Marurumduman na saro si Batocabe sa 38 mga lehislador na nag-uyon na may probable cause tangani na mapa-impeach si Chief Justice Sereno.
