NAGA CITY- Nagtutubod an lado ni Vice President Leni Robredo na sa gigibuhon na recount kan mga ballot boxes sa Camarines Sur, Negros Oriental asin Iloilo, mapapatotoohan na an opisyal an totoong ganador sa nakaaging vice presidential race kan 2016 elections.
Sa ekslusibong entrevista kan Bombo Radyo Naga ki Atty. Bernadette Sardillo, legal counsel kan bise presidente, sinaysay kaini na kompyansa sinda na sa recount, mapapatotoohan na an Bicolanang opisyal an nagtrayumpo sa eleksyon kontra sa enot nang pahayag ni dating Sen. Bongbong Marcos na nandaya an bise presidente.
Napag-araman na labi sa 1,800 an kabilugang mga ballot boxes na kukuanon kan Presidential Electoral Tribunal sa Camarines Sur.
Enot kaini, sinaysay ni Sardillo na nilalaoman nindang sa aldaw nin Biyernes matatapos an paghahakot nin mga balota hale sa probinsya.
Nangapodan man an lado ni Robredo sa mga nagsusuporta digdi asin an mga makondusir nin hiro protesta saaga na likayan an magpuon nin kariribukan sa retrieval kan mga ballot boxes.
