Pinahiwas kan mga awtoridad an mga road closures na iimplementar sa nagkapirang mayor na tinampo sa Ciudad nin Naga bilang preparasyon sa mga aktibidad na may kinaaraman sa Traslacion asin iba pang prusisyon.
Sa paghampang sa mga Kagawad kan Media ni Arnulfo Fausto- Head, Traffic Management Team, PSO Naga City, sinabi kaini na kabali sa mga rebisadong plano an pagsara kan Misericordia asin M. Castro. Base sa rekomendasyon kan Land Transportation Office (LTO), isasara na sana an nasabing seksyon envez gibuhon na one-way ngani na maibitaran an paggutok asin peligro sa mga motorista. An mga residente na nakaistar sa lugar magkakaigwa pa man giraray nin access.
Dugang pa ni Fausto sa mga hali sa direksyon kan Panganiban, pwedeng gamiton an Magsaysay section asin mga alternatibong tinampo arog kan Isarog Avenue asin Mayon Avenue.
Pinalawig man an pagsara kan tinampo puon sa J. Hernandez Avenue sagkod sa Abella. Ini pigkokonsiderar an bilang kan mga tawong nag-aaragi, mga behikulo asin mga ambulant vendors na posibleng magin kawsa nin paggutok orog na sa panahon nin Traslacion. Para sa mga hali sa Tabuco pasiring sa Bagong Bayan, pwedeng magliko sa wala sa Abella asin mag-agi sa Queborac bilang alternatibong agihan.
Pigheras kaini kan opsiyal na sa lugar kan Bagong Bayan, ipapaabot man sa Sky City an pagsara kan tinampo. Alagad tutugutan na makapasar an mga masimba, lalo na an mga may kinakaipuhan na dokumento o special purpose. Inaabisuhan an mga motorista na maggamit nin alternatibong ruta sa paagi kan Ateneo asin Pisantos.
Mientrastanto, nakumpirmar na magdadanay an ruta kan Traslacion na ginamit kan nakaaging taon. Hale sa Peñafrancia, an prusisyon maagi sa Peñafrancia Avenue, maliko sa too sa P. Burgos, pasiring sa Elias Angeles asin pasiring sa direksyon kan katedral. Pag-abot sa dalan Iglesia, an prusisyon maagi sa seksyon pasiring sa Porta Maria.
Nagkondusir man nin road clearing asin walkthrough an mga otoridad tangarig na masiguro na mayong ulang sa ruta kan prusisyon.
Kasabay kaini, pig-aandam man kan mga awtoridad an mga bagong road signs asin barikada na gagamiton sa mga tinampo na isasara. Igwa man nin mga bagong kagamitan na itinao para sa pagmanehar kan trapiko, mantang padagos an paghirahay asin pagsalida kan mga raot na karatula sa trapiko.
Dugang pa ni Fausto na para sa Fluvial Procession, igwa nin proposal na baguhon an ruta tanganing magdiretso imbes na magliko sa wala pasiring sa Adbyento. Sa ngonian, nasa pinal pang diskusyon bago iimplementar, huli ta katuyuhan kan mga awtoridad na maseguro an mas ligtas asin areglado na dalagan kan prusisyon asin maibitaran an paggutok sa mga mahiwas na seksyon kan ruta.
