Susog sa Department of Justice kan nakalihis na Biyernes na dae ninda kinukonsiderang state witness sa flood control anomalies si Leyte 1st District Rep. Ferdinand Martin Romualdez.
An lado kan Department of Justice pormal na pinahimutikan an mga reports na si former Speaker of the House of Representatives Martin Romualdez an presenteng pigkonsiderar komo state witness.
Mayo soboot nin factual o legal basis sa nasambitan ng misinformation, sigun ki bagong DOJ spokesperson Raphael Martinez.
Tangani maisaalang-alang komo state witness, dapat na munang magsunad nin aplikasyon sa DOJ sa paagi kan Witness Protection, Security and Benefits Program (WPSB).
An aplikasyon an susurion tangani masierto kun an aplikante an kuwalipikado o dae komo state witness.
As of date, si former Speaker Martin Romualdez dae pa nagsusunad nin application for state witness sa DOJ, sigun pa ki Martinez.
Mientrastanto, pigsierto ni Martinez sa publiko na an gabos nin pagsisiyasat an gigibuhon “marikas asin patas,” asin “mayong masasalbar” kun totoo an ebidensya.
Pinatanidan man kan ahensya an publiko na dae malinlang kan mga salang katotohanan o pampulitikang propaganda na nagpapaitok-itok o naggagamit nin mga legal na termino tangani ribungon an publiko.
Sigun pa sa DOJ Spokesperson, na pinagirunduman pa ninda an taumbayan na mag-rely sana sa mga verified asin official information gikan sa mimong DOJ.
An Department of Justice nagtitinir na pusog sa commitment tangani maibusol nin tama an rule of law, na giniya kan katotohanan asin bako kan Pulitika.
Mientrastanto an Independent Commission for Infrastructure (ICI) kan nakalihis na Biyernes an nagpadagos sa saindang inter-agency coordination meeting kaiba an mga representantes gikan sa Department of Health at Department of Education.
