Hagad ni House Speaker Martin Romualdez sa mga Pilipino na halion an takot, pagkabaranga asin iriwal sa tahaw kan nagpapadagos na kariribokan sa pulitika kasabay kan pagselebrar kan ika-161 Bonifacio day ngunyan na aldaw nin Sabado, Nobyembre 30.
Sa mensahe kan House Speaker, pigsaysay kaini na kasabay kan pagrumdom kan katapangan asin mga sakripisyo kan hero na si Gat Andres Bonifacio, an Ama kan Himagsikan, ini nagpapagirumdom kan importanteng papel kan integridad, pagkasararo asin responsibilidad para sa sa nation-building.
Sinabi kaini na nanindugan si Bonifacio laban sa panininiil asin pagkabaranga, napagtrayumpuhan nin labi sa gabos an obheto nin kalayaan, katarungan asin karahayan kan mga Pilipino.
Sa panahon soboot na napapaatubang an gabos sa mga problema, kun saen pigsusubok an mga prinsipyo nin demokrasya asin marhay na pamamahala, hinagad ni Romualdez sa gabos na magkua nin inspirasyon sa kusog nin boot asin katapangan ni Bonifacio.
Saro man suboot na pagirumdom an buhay ni Bonifacio na kaipuhan kan sarong tunay na lider bako sana an kusog kundi respeto sa kapwa tawo asin hararom na pag-apresyar sa responsibilidad tanganing maitulod an mas ikakarahay para sa gabos.
Piginkaminar man ni Romualdez an mga Pilipino na magkasararo sa espiritu kan Bayanihan para sa sarong nasyon na igwa nin katuninungan, hustisya asin kauswagan para sa gabos.
Dugang pa kaini, an gabos dapat na magtao nin onra komo pagrumdom ki Bonifacio sa paagi nin pagprotehir sa demokrasya asin kalayaan na saiyang pinaglaban nin bilog tanganing makamit.
