Pig-asegurar kan Russia na tatawan ninda nin maingat na pagsusuri an kasunduang pangkatuninungan sa pag-ultanan kan Armenia asin man Azerbaijan na pinangenutan kan Estados Unidos.
Alagad, an kaalyado kan Russia na nasyong Iran an mahigot na tinutulan an plano kan sarong bagong border corridor na suportado ni U.S. President Donald Trump.
Ini pa man an katakod kan kasunduan na pigtintaan sa Washington kan nakalihis na Biyernes, Agosto 8 na obhetong tapuson an haloy na girian sa pag-ultanan kan Armenia asin Azerbaijan.
Kabali sa mga probisyon kan kasunduan an pagpapatigdok nin sarong transit corridor na masumpay sa Azerbaijan asin man an exclave kaini na Nakhchivan, sarong haloy nang pighahagad na proyekto kan Baku.
An Amerika kaya an magkakaigwa nin karapatang mag-develop nin corridor, na inaapod na “Trump Route for International Peace and Prosperity.”
Alagad tutol digde an lado kan Iran. Sigun ki Akbar Velayati, tagapayo ni Iranian Supreme Leader Ayatollah Ali Khamenei, posible ining magkawsa nin peligro sa seguridad kan rehiyon asin man pighurot na dae mangyayari an nasambitan ng proyekto.
Mientrastanto, sinabi man kan Moscow na kaipuhan pa nindang surion nin marahay an mga detalye kan kasunduan, orog na an isyu kan corridor.
Sigun ki Maria Zakharova, tagapagtaram kan Russian Ministry of Foreign Affairs, may mga kasunduan nang nag iiral sa pag-ultanan kan Russia, Armenia, asin Azerbaijan, kaya man dae pa malinaw kun pano ini naaapektaran kan bagong kasunduan.
Bagaman naoogma an Azerbaijan asin Armenia dapit sa lakdang kan Estados Unidos, igwa nin mga analyst man an nagtaong-pansin sa kakulangan kan mga detalye asin an posibleng mga ulang sa implementasyon kan kasunduan.
Nagtutubod kaya an mga ini na an kasunduan an nagpapahiling sana soboot nin pagbagsak kan impluwensya kan Russia sa rehiyon, kawsa kan gyera sa Ukraine.
