Nangapudan sa mga motorista an SK Federation na dapat na awtomatikong maghinay-hinay, magpundo asin magtao nin dalan kun an sarong pedestrian minalaog o minabalyo sa sarong pedestrian crossing, sa pangapudan para sa mas ligtas na paggamit kan tinampo.
Sa isinagibong privelege speech ni Jefferson Felix, SK Federation President, pinagtawan-duon na dae dapat maghiro o mag-andar an sarong lunadan sagkod na dai pa lubos na nakaagi an pedestrian crossing. Sinabi niya na an praktis na ini komun na sinusunod sa nagkapirang nasyon sa Solnopan.
Ipigshare man an sarong eksperyensya sa Estados Unidos kun sain minapundo tulos an sarong behikulo dawa igwa pa nin pirang metros an distansya sa pagultanan kaini asin kan pedestrian, bilang parte kan pagtao nin prayoridad sa kaligtasan kan mga nagbabalyo.
Alagad, pigduon na bako sanang pagbabago sa gawi-gawi kan mga motorista an kaipuhan tanganing mapakarhay an kaligtasan sa mga pedestrian crossing.
Sinabi man na importanteng siyasaton an aktuwal na kamugtakan kan mga pedestrian crossing, kaiba na an kalinawan kan mga marka kaini, bastanteng ilaw sa palibot kaini, asin iba pang lugar sa ciudad na parating binabagtasan kan mga pedestrian.
An relasyon kan dalagan kan mga naglalakaw asin mga lunadan dapat man na pag-adalan tanganing madeterminaran an mga lakdang na makakatabang na malikayan an mga aksidente asin makagibo nin mas ligtas na mga tinampo para sa gabos.
