Ipinag-ordenar kan Third Division kan Sandiganbayan sa warden kan Bureau of Jail Management and Penology (BJMP) na ipalaog bilang detention prisoner si dating House Speaker Martin Romualdez huli sa kasong plunder manungod sa sinasabing P7.4 bilyong infrastructure kickback scheme.
Itinalaan kan anti-graft court an saiyang arraignment asin pre-trial sa maabot na Setyembre 14.
Alagad, segun sa Philippine National Police (PNP), nagdadanay na bakong “medically fit to travel” an dating opisyal base sa medical certification kan saiyang mga doktor sa Cardinal Santos Medical Center.
Naroromdoman na inaresto asin isinairarom sa police custody si Romualdez sa laog kan ospital kan Lunes mantang nagpaparahay sa cardiovascular event, alta presyon, asin panic attack.
Pinagpaliwanag man kan korte an saiyang mga attending physician tanganing magtao nin opisyal na report manungod sa saiyang tunay na kondisyon.
Sa ngunyan, padagos an pakikipag-takod kan Criminal Investigation and Detection Group (CIDG) sa ospital kun sakaling magbago an saiyang kamugtakan sa salud tanganing maipresentar siya nin personal sa korte.
