Magkakaigwa an Sangguniang Panlungsod nin sarong espesyal na pagtiripon sa sesyon sa Oktubre 6 tanganing pag-olayan an estado kan mga mayor na proyekto sa ciudad, kabali na an proyekto sa Milchor Villanueva Avenue asin mga proyekto sa pagbawas kan baha.
Sa paghampang sa mga Kagawad kan Media ni Naga City Vice Mayor Gabby Bordado, sinabi kaini na yaon si District Engineer Jose Gigantone, Acting City Engineer Engineer Aguilar, asin Project Monitoring Committee Chairman Attorney Nina Rances para magtao nin updates asin simbagon an mga kahapotan hale sa mga konsehal.
Ipig-anunsyo man ni Bordado na piglalaoman na mabisita si DPWH Secretary Vince Dizon para liwat na inspeksyunan an proyekto sa Milchor Villanueva Avenue asin makipag-ulay ki Mayor Leni Robredo.
Tinawan man niya nin duon an pangangaipo para sa mas marahay na pagkontrol kan baha asin mga agihan nin tubig, siring man an pag-andam para sa piglalaoman na El Niño asin kakulangan nin tubig na dara kan pagbabago kan klima asin El Niño.
Sinabi ni Bordado na suportado kan Sangguniang Panlungsod an mga long-term programs kan ciudad sagkod sa 2028 tanganing masimbagan an pagbaha asin kakulangan nin tubig.
