NAGA CITY- Pagbuhat gikan sa depression pasiring sa trayumpo. Ini an nagin pagsasaladawan kan sarong 20-anyos na Bicolano na nasungkit an Top 1 spot sa pigkundusir na April 2024 Midwifery Licensure Examination.
Sa entrevista kan Bombo Radyo Naga ki RM Judah Paulo Espero, gikan sa Camarines Sur Polytechnic College-Nabua, sinaysay kaini na saiyang nakua an rating na 91.70% sa eksaminasyon sa ibong kan kadipisilan asin kapagalan na saiyang kinahampang.
Sigun ki Espero nawaran na ini nin paglaom na makakapasa orog na an makalaog sa topnotcher nin huli sa labing kadipisil kan pinag-agihan na eksaminasyon. Kun kaya labi an saiyang pagkakilhag asin siringman pasasalamat sa Kagurangnan nin huli sa nagin resulta kan exam.
Katakod digde, dakula man soboot an saiyang pasasalamat sa saiyang mga kapamilya, sa eskwelahan na saiyang pigkaklasehan nin huli ta an mga ini an saiyang nagin inspirasyon tanganing maglapigot sa saiyang mga pangiturugan sa buhay.
Dugang pa ni Espero siring kan saiyang nasambitan, dae madali an pag-abot sa saiyang pangarap, kun kaya labing pagti-tiyaga asin pag-aadal an ginibo kaini siring na sana kan pag-enroll sa review center tanganing magin prepado sa nasambitan ng eksaminasyon.
Sa ibong kan saiyang pagiging consistent Dean Lister, nagtagama pa ini nin bastanteng oras sa pag-aadal tanganing makapasar asin makalaog sa topnotcher. Sa enot soboot nursing an saiyang balak na kuonan na kurso nin huli ta mawot kaini na na mag-medicine alagad naubusan ini nin slot kun kaya napuli sa midwifery. Sa pangkabilugan, sa ibong kan saiyang pinag-agihan na kadipisilan sa saiyang journey sa buhay mayo ining pinagsisihan sa kinuang kurso nin huli ta an paglaog sa midwifery an marangal na desisyon.
Sa ngunyan, payo na sana ni Espero sa mga mawot na i-pursue an midwifery, mag-adal nin marhay asin pirmeng maghagad nin giya sa Kagurangnan.
