Nanganganib na mahulog sa tila hararom na bangin an labi 1,000 na kaharongan sa munisipalidad kan Buriticupu sa Brazil huli sa mahewas na sinkhole.
Mahihiling sa video kun gurano kadakula asin kararom an kalot sa daga na pigtutumbok an nasa labi 1,000 kaharongan.
Pirang harong na an narat asin hinalon kan sinkhole, asin igwang mga residentes na naghali huli sa takot.
Sigun sa pirang mga residentes, taong-2017 pa ninda nanuntaran an mga gatak sa daga alagad dae ini tulos inaksyunan kan saindang lokal na gobyerno.
Ngunyan na malala na an sitwasyon, nagdeklarar nin state of emergency an lokal na gobyerno. Igwang 55,000 an nakaistar sa Buriticupi, asin nasa 1,200 an nasa peligrong halunon kan sinkhole an mga harong.
Sigun sa mga eskperto, nagrekas an pagdausdos kan daga sa lugar huli sa mga sablay na pagkakagibo kan mga establisyemento, asin pinalala pa kan deforestation o pagkakalbo kan kagubatan.
Mabaybay man soboot an daga sa lugar kaya madali ining magbigay.
Aminado an otoridad na kulang sinda sa kapasidad tanganing hanapan nin solusyon an saindang problema.
Pupuonan na kan gobyerno an reocation kan mga apektadong residentes alagad aminado sindang mayo pang solusyon sa nangyayaring hararom na paggatak kan daga.
