NAGA CITY – Pangapudan ngunyan kan kapitan kan Tinago, Naga City sa mga pet owners na igakod o dae paghayaan na makaluwas an saindang mga atamang hayop asin magbasaybasay sa mga tinampo.
An nasambitan ng pangapudan an makalihis na mabiktima nin hit and run an sarong ido sa saindang barangay kasubanggi, Agosto 7, 2024.
Sa entrevista kan Bombo Radyo Naga ki Estelita Bautista, Kapitan kan nasambitan ng lugar, sinaysay kaini na dapat na magin mga responsableng pet owners an gabos tanganing malikayan an siring na insidente.
Maswerte naman na nakasalbar an nasambitan ng ido asin naibalik na sa saiyang kagsadiri. Mantang an driver man kan behikulo na nakabudal digdi an naarestar na.
Dugang pa ni Bautista na pigpapautob man sa saindang barangay an ordinansa na nagbabawal sa mga basay basay na ido, ayam o ikos sa mga tinampo huli ta posible ining magkawsa kan aksidente.
Kun kaya pangapudan kan opisyal na igakod na sana an mga ini sa laog kan bakuran o perming siertohon na nakasarado nin marhay an mga gate tanganing dae sinda makaluwas.
An mga nadadakop man soboot na mga ayam sa saindang barangay an pigdadara sa pounding facility kan syudad asin duman na sana pigkukua kan mga kagsadiri kaini.
Sa ngunyan, pakiulay na sana kan opisyal na perming isaisip an kasalbaduhan nin lambang saro asin likayan na maka disgrasya kan iba huli sana sa kapabayaan kan nagkapira.
