Ibinunyag ni Senador Rodante Marcoleta, Chairman kan Senate Blue Ribbon Committee, na igwang sarong contractor na imbwelto sa maanomalyang flood control projects an presenteng nasa ibang nasyon.
Nilinaw kan senador na dae ini maikokonsiderar na pagtakas asin mayo man kapangyariyan an komite na pugolan an saindang paghali.
Ipinaliwanag kaini na sulamenteng lookout bulletin order sana an pwedeng hagadon kan Senado sa Bureau of Immigration, mantang korte sana an igwang otoridad na magluwas nin hold departure order.
Siring man, pigtawan-duon ni Marcoleta na dae aakuon kan Senado an dae paghampang kan mga personalidad sa mga pagdangog.
Nagpatanid pa ining ipapaaresto an sisay man na magporbar na isnabon an imbestigasyon.
Pig-enkaminar kaini an mga kontratista na imbwelto na ilantad an mga opisyal kan DPWH asin iba pang darakulang tawo na imbwelto sa mga ghost projects.
Sigun sa saiya, bako man an mga kontratista an “most guilty” asin pwede sindang dae kasuhan nin kriminal kun babayadan an danyos asin tatapuson an mga nawalat na proyekto, alagad karibay kaini, dapat nindang itukdo an mga primerong responsable.
