NAGA CITY – Natumtom kan kalayo an sarong lunadan sa banwaan kan Maharlika Highway sitio Castilla, Brgy. Napolidan Lupi Camarines Sur.
Sa entrevista kan Bombo Radyo Naga ki SFO3 Nezzer Montalbo, Spokesperson kan BFP-Lupi, Camarines Sur, sinaysay kaini na pigmamaneho kan sarong babaye an nasambitan ng behikulo na mapuli kuta sa banwaan kan Goa gikan Jose Panganiban, Camarines Norte, alagad mantang pigbabagtas an agihan, igwa soboot nin biglang nagputok sa inutan kan behikulo asin bigla na sanang nagkaigwa nin a-so hasta sa magkalayo ini.
Sigun man sa driver, pinagpasalamat kaini na nakaluwas ini sa behikulo.
Basado man sa fire pattern, baterya kan engine an pinaggikanan kan kasulo na posibleng huli sa short circuit o nag-over heat.
Dugang pa kan biktima, sa duwang taon kan saiyang behikulo mayo man sindang nanunutaran na problema digdi kun kaya labi na sana an saindang pagkabigla.
Mientrastanto, mayo man nin nasapo na maski anung lugad an biktima alagad namumundo ini nin huli ta apwera sa saiyang behikulo, igwa pa nin dakulang kantidad nin kwarta an natupok.
Sa ngunyan, liwat nagpagirumdom an opisyal sa mga byahero orog na ngunyan na nagrarani na an Semana Santa na antes magbyahe, siertohon an pig-double check an saindang mga behikulo, siringman an sadiri na physically fit sa pagbyahe orog na kun harayo an saindang dudumanan.
