Inihayag ni Vice President Sara Duterte na igwang sarong nasyon na soboot nagtugot na mag-ako sa saiyang amang si dating Presidente Rodrigo Duterte, na presenteng nakakulong sa The Hague, Netherlands mantang piglilitis sa International Criminal Court (ICC) huli sa mga kasong igwang kinaaraman sa crimes against humanity katakod kan saiyang madugong kampanya konta sa ilegal na droga.
Sa saiyang patara-tara sa hampang kan mga Pilipino sa Japan kan nakalihis na Sabado, Setyembre 20, sinabi ni VP Sara na ini mismo an nakipagnegosasyon sa mga nasyon tanganing makahanap nin mapagkakatiwalaang nasyon na ma-ako sa saiyang ama huli man ta mayo soboot ining malalaoman sa Pilipinas.
Dae na pinangaranan kan bise presidente an nasambitan ng nasyon, alagad pagsierto kaining bako soboot Japan.
Naenot na mang sinabi kan Australia na nagsayuma ining akuon si Duterte.
An pahayag kasunod kan kahagadan kan kampo ni Duterte para sa interim release, na pigsunad kan nakalihis na Hunyo.
Hurot kan saiyang abogado, mayo soboot flight risk si Duterte asin dae kinakaipuhang magtinir na nakakulong mantang piglilitis.
Siring man, nagtutuol an Office of the Prosecutor kan ICC, asin pighurot na kinakaipuhan an padagos na pagkakakulong ni Duterte tanganing masierto an saiyang pag-atenir sa paglilitis, asin tanganing malikayan an posibleng panghihimasok sa kaso o sa mga testigo.
Katakod kaini, duwang organisasyon sa Pilipinas na nagtatabang sa mga pamilya kan mga biktima kan war on drugs an nagpahayag man kan pagtutol sa paramientras na paglaya ni Duterte, huli soboot sa peligro na maimpluwensiyahan kaini an mga imbestigasyon asin kasalbaduhan kan mga testigos.
Marurumdumang si dating Presidente Duterte, idinetine sa Netherlands kan nakalihis na Marso 2025, asin nahahampang sa paglilitis katakod kan mga garadanan sa irarom kan war on drugs na sigun sa pulisya nagpakol sa 6,000, alagad sigun sa mga human rights group, psoibleng magpakol ini sa 30,000 kaibahan na an mga vigilante killings.
