NAGA CITY – Pig-abisohan kan sarong opisyal sa siyudad nin Naga an mga paratienda kan paputok ngunyan na holiday season dapit sa klase kan mga paputok na dapat sanang itinda.
Sa entrevista kan Bombo Radyo Naga ki MA. Cristina Intia, Punong barangay kan Dinaga, Naga City, sinaysay kaini na pinag-uurulayan na an designated areas para sa mga matinda nin paputok siringman sa mga produkto na dapat sanang itinda. Kun saen an mga paputok na ipinagbabawal an kukumpiskaron kan mga otoridad, kun kaya dapat aram kan mga ini an mga pwede sanang itinda na paputok orog na ta enkaso madakop, igwa ini nin penalidad.
Apwera pa digdi, pinag-uurulayan naman an lugar kun saen sana pwedeng magputok.
Katakod kaini, pigrekomendar kuta kan saindang lado na an river side sa saindang barangay komo designated area para sa mga mapaputok nin huli ta harani ini sa salog, tanganing maski papano an mayong madadanyaran alagad igwa talaga nin nagkapira an dae napupugolan na magpaputok sa tungod kan saindang harong.
Mientrastanto, enkaso man igwa sinda na madadakop na menor de edad na pinabakalan nin paputok an itu-turn over soboot ninda ini sa otoridad orog na ta igwa nin kaukulang penalidad sa paratienda.
Sa ngunyan, liwat na nagpagirumdom an opisyal na siertohon an kasalbadohan ngunyan na kapaskuhan.
