Nag-surrender an sarong senior citizen sa mga otoridad sa banwaan kan San Jose, Partido Camarines Sur.
Binisto an akusado na si Alyas Boboy, 84-anyos asin residente kan Presentacion, sa nasambitan ng probinsya.
Sa entrevista kan Bombo Radyo Naga ki PCPT Mark Spaña, Office in Charge kan San Jose MPS, sinaysay kaini na kan aldaw nin Huwebes, Enero 6, 2025, kusang nagpasiring an suspek sa saindang hepatura huli sa kaso kaining rape kan 2014.
Sigun ki Spaña, an boluntaryong pagsuko kan suspek an tulos man nindang piggibuhan nin dokumentos asin tulos naireport sa provincial office.
Dugang pa kan opisyal, nangyari an krimen sa lugar kun saen nakaistar sa suspek alagad mas pinili kaini na sa San Jose na magsurender tanganing maipresentar na sa San Jose RTC.
Mientrastanto, pigtutubodan man kan opisyal, na nagtago an akusado nin haros 11 taon sa Metro Manila huli sa takot kan kaini sa kaparientes kan biktima asin ngunyan sanang Bulan nin Pebrero na puli sa banwaan tanganing linigon an saiyang pangaran.
Sa ngunyan, nakapagpiyansa soboot an akusado nin nasa P120,000 alagad sa maabot na Pebrero 17 an igwa ini nin hearing.
Katakod kaini, liwat man pig-enkaminar kan opsiyal an publiko na enkaso igwa nin kaparientes na nahahampang sa anuman na krimen o igwa nin warrant of arrest na magsurender na sa mga otoridad, nin huli ta pwede pa soboot sindang matabangan orog na sa seguridad kan akusado.
