Aram baya nindo mga ka-Bombo, sarong spa sa Tokyo an agaw-atensiyon ngunyan huli sa pigtatangro kaining kakaibang paagi kan pagpapahingalo kun saen iyo an meditation sa laog kan kabaong.
An establisyemento an inapod na Meiso Kukan Kanoke-in sa Takadanobaba na obhetong tawan an saindang mga kliyente nin tyansang pagnilayan an buhay sa paagi kan pagigin conscious sa konsepto kan kagadanan.
Sa kantidad na 2,000 yen o katampad kan 780 pesos, pwedeng maghigda sa laog kan Japanese-style na kabaong sa laog nin 30 minutos.
Mantang nasa laog ka kaya kaini pige-enkaminar kang mag-isip nin hararom o magpahingalo mantang nagdadangog nin healing music.
Igwa ining sadit na bintana na pwedeng bukasan kun dae na komportable sa laog.
Sigun pa sa spa, bukas ini sa gabos kan relihiyon. Siring man, mahigot an mga patakaran kan parlor para sa kasalbaduhan.
Nag-aako sana sinda nin mga kliyente na edad 18 pataas na dae malampas sa 6 feet an langkaw, asin dae magabat sa 90 kilograms an timbang.
Mahigot man na ipinagbabawal an serbisyo sa mga tawong igwang claustrophobia o takot sa piot na lugar, asin pighahagad na nasa marhay na mental health an sisay man na maporbar kaini.
