Nagtututok an lokal na gobyerno kan Daet sa seguridad asin katoninongan bilang parte kan preparasyon sa pagdagsa kan mga turista, orog na sa maabot na Third National Surfing Summit asin iba pang aktibidad sa turismo.
Sa intrevista kan Bombo Radyo Naga ki Benjamin Marlon Bandelaria – Municipal Councilor, Daet, Camarines Norte, sinabi kaini na mas pinapakusog kan LGU an koordinasyon sa PNP asin iba pang nakaunipormeng personahes. Nagkaigwa na man nin mga seminar asin training para sa mga bantay sa barangay, tricycle drivers, hotel staff asin surfers para mamantenir an tamang pagtratar asin kaligtasan kan mga turista.
Kasabay kaini, tinatawan man nin atensyon an kalinigan sa mga destinasyon kan mga turista, partikularmente sa Bagasbas Beach. Sarong clean-up drive an ginibo kan dai pa sana nahahaloy asin padagos na pig-eenkaminar an mga residente asin turista na protehiran an kapalibutan asin responsableng iapon an saindang mga basura.
Dugang pa ni Bandelaria pigpreparan man kan Daet an mga aktibidades para sa Third National Surfing Summit, na piglalaoman na aatenderan kan mga surfers hale sa manlaen-laen na parte kan nasyon. Sigon ki Bandilaria, katuyuhan kan lokal na gobyerno na lalo pang mapauswag an surfing asin iba pang aktibidad sa turismo bilang paagi tanganing makamukna nin trabaho asin mapakusog an lokal na ekonomiya.
Mientrastanto, mantang nag-aandam an ciudad para sa mga aktibidad sa turismo, padagos man an pig-aatubang kan Daet sa krisis sa supply nin tubig. Nagkapirang mga barangay an nakakaeksperyensya nin kakulangan o kakulangan nin tubig, alagad pigsierto kaini na padagos an ginigibong lakdang kan lokal na gobyerno tanganing masimbagan an pangangaipo kan mga residente asin mamantenir an pagigin andam kan banwaan para sa mga turista.
