Mas orog pang pighigutan kan US Secret Service an saindang pagbabantay sa White House makalihis an sarong insidente kun saen igwang lalaki na igwang darang badil harani sa nasambitan ng lugar an binadil kan sarong US Secret Service personnel .
Sa report ni Bombo International News Correspondent Florante Coronel, gikan sa New York City, sinaysay kaini na an nasambitan ng lalaki an nagpurbar na maghugot.
Susog sa nagin pahayag ni Secret Service Chief of Communications Anthony Guglielmi an 27-anyos na lalaki na binistong si Andrew Dawson an gikan sa North Manchester, Indiana na pasiring sa Washington.
An lalaki an nagbiyahe nin haros 9 hasta 10 oras asin pigparada kaini an saiyang lunadan harani sa White House.
Sigun ki Coronel, pigranihan kan US Secret Service personnel an lalaki alagad tolos man na nagluwas nin badil na nagresulta sa pagribayan nin putok.
Huli kaini, lugadan an lalaki asin dinara sa ospital mantang mayo man nalugadan sa lado kan Secret Service personnel.
Basado man sa report, mayo sa White House si US President Donald Trump kan mangyari an insidente.
Sa ngunyan, nagsasagibo na nin imbestigasyon an DC Metropolitan Police Internal Affairs Division Force Investigation team sa nangyaring insidente.
