Padagos an pagpepreparar kan Senado para sa nakaambang impeachment trial kontra ki Vice President Sara Duterte.
Ini an pigkompirmar ni Senate Spokesperson Arnel Bañas kun saen sa Hunyo 2 an pagbabasa kan articles of impeachment asin pagtungtong kan Hunyo 3, digde na manunumpa an mga senador tanganing magpuon an impeachment trial.
Paglilinaw ni Bañas, an mga manunumpa sana sa Hunyo 3 iyo an mga senador gikan sa 19th Congress.
Huli man ta nasa Senado na an bola, kun ano man soboot an rason tanganing dae ini idagos, iyo an desisyon na kan halangkaw na kapulungan kan Kongreso.
Sa ngunyan, mayo soboot nareresebir si Bañas na instruction tanganing dae idagos an nakaambang paglilitis kontra ki VP Sara.
Mientrastanto, pigkompirmar man kan tagapagtaram kan Senado na magpasiring mismo sa Senado an House Prosecution pansel tanganing basahon an articles of impeachment kontra ki Duterte.
Dugang ni Bañas, dae madidiskaril an legislative duties kan mga senador huli ta aga nakatalaang puonan an impeachment asin sa hapon man an sesyon kan duwang Kapulungan kan Kongreso.
