Boluntaryo suboot na masuko si Senador Jinggoy Estrada sa Philippine National Police – Criminal and Investigation Detection Group (PNP-CIDG) katakod kan isisirbi saiyang warrant of arrest sa kasong plunder.
Inanunsyo ini kan lehislador sa isinagibong press conference sa Senado, kun sain inibanan siya nin nagkapirang miyembro nin Majority bloc na sinda Senate President Alan Peter Cayetano, Senador Rodante Marcoleta, Imee Marcos asin Camille Villar. Yaon man sa isinagibong paghampang sa media an PNP-CIDG asin si Interior Secretary Jonvic Remulla.
Dugang pa kan senador, dai siya mahagad nin kustodiya sa Senado ta nganing maprotehiran siya sa saiyang paninimbagan sa ley. Marurumduman na si Senador Bato Dela Rosa tinawan kan halangkaw na katiripunan kan Kongreso nin protective custody, rason kun tano dai nasirbihan an pigkukunsiderang puganteng senador nin arrest warrant hali sa International Criminal Court (ICC).
Isusuko man kain suboot an saiyang suweldo komo senador mantang hinahampang an saiyang kaso asin ipigpahayag man niya an saiyang kagustuhan na magtenir na “independent” sa impluwensiya kan Senado.
Katakod kaini, saiya man na ipigpahayag na nakaresibe na siya nin nagkapirang pag-engganyar hali sa Minority bloc ta nganing mabasura an saiyang sala.
Mayo pa man na pormal na kasimbagan an Minority sa alegasyon ni Estrada.
Mientrastanto, mayo pa mang pormal na kasimbagan o apela an senador sa nasambitang korte.
Naghali si Estrada paduman sa Camp Crame makalihis an isinagibong press conference. Makalihis iniyo, napabareta man an pagsuko ni dating DPWH Secretary Manuel Bonoan sa CIDG katakod kan nasambitang kaso kun sain kaibanan niya an senador sa pigsangatan nin huli sa suboot pagresibe nin maabot sa P573 milyon na kickback resulta kan flood control anomalies.
