NAGA CITY- Temporaryong tinawan nin pwesto an nasa 100 na sidewalk vendors na makapagtinda sa gilid kan Naga City Peoples Mall sa laog nin duwang semana sa oras na alas 5 hasta alas 10 nin bangi.
Sa nagin paghampang sa mga kagawad kan media ni Naga City Mayor Leni Robredo, sinaysay kaini na an nasambitan ng lakdang an susog naman sa Executive Order no.13-2025 kan LGU Naga asin MEPO.
Obheto soboot kan nasambitan ng lakdang an tanganing magin organisado na an mga paratienda asin dae makaperwisyo sa tinampo siringman sa mga empleyado kan MEPO.
Apwera digde, sa paagi man kan temporaryong pwesto na ini dae na kaipuhan pang magtago o magdalagan kan mga sidewalk vendors enkaso yaon an presensiya kan PSO asi mga kapulisan.
Mientrastanto, aminado man si Robredo na masakit an pagbabalanse orog na ta kadakol an dapat na isipon katakod kan saindang lakdang na malinigan an kasentruhan kan siyudad nin Naga.
Huli kaini padagos soboot an pag-aadal tanganing mahanapan na nin mababalyuhan an mga nagtitinda tanganing dae man madanyaran an saindang kabuhayan.
Sa ngunyan, hagad na sana kan alkalde an pag-iintindi asin kooperasyon kan gabos para sa mas marhay asin mauswad na Naga City.
