NAGA CITY- Nanindugan ngonyan an Simbahang Katoliko na dae sinda matugot na maipasar sa Pilipinas an same-sex marriage.
Ini katakod kan enot na naging pahayag ni Presidente Rodrigo Duterte na saiyang susuportaran an pagpapakasal kan magkaparehong kasarian.
Sa entrevista kan Bombo Radyo Naga ki Rev. Fr. Felix Abaño, kura paruko kan Holy Cross Parish sa ciudad nin Naga, sinaysay kaini na dae matugot an Simbahang Katoliko na maging legal an same-sex marriage sa nasyon.
Dugang pa ni Rev. Fr. Abaño, dae kabale sa kasuguan kan Simbahan an nasambitang pagtubod asin solamenteng an karahayan sana an saindang pigtutukdo basado sa bibliya asin kasuguan kan Diyos.
Sa ibong kaini, pigklaro man ni Rev. Fr. Abaño na saindang nirerespeto an LGBT community asin solamenteng an mga sala suboot na gawi arog kan same-sex marriage an saindang mahigot na pigkokontra.
Mientrastanto, sigon pa sa nasambitang padi, nagtutubod siya na nag-ugat an pahayag kan hepe ehekutibo sa personal sana kaining opinyon.
