NAGA CITY- Emosyonal an bagong ilihir na Sangguniang Kabataan (SK) Chairman sa barangay Sta. Cruz, Naga City makalihis na dagos na ining maiproklamar subagong aga kan manggana sa pigkondusir na toss coin sa opisina kan Commission on Election (comelec).
Sa entrevista kan Bombo Radyo Naga ki SK Chairman Elect Ray John Saniel, sinaysay kaini na antes pa pigkondusir an toss coin, naiandam na niya an saiyang sadiri sa posibleng magin resulta kaini kaya dae na siya nakamate pa nin anuman na paghandal.
Napag-araman na subagong alas-9 nin aga kan magpasiring sa opisina kan Comelec-Naga si Saniel kaibanan an saiyang kalaban na si Kian Gomez para sa pigkondusir na toss coin makalihis na mag-tie an mga ini sa botong 252.
Sigon ki Saniel, nahiling niyang pareho sindang mawot kan tao alagad saro sana sa sainda ni Gomez an deserving na magtukaw komo SK Chairman sa saindang barangay.
Enot kaini, ipinauktaba muna kan Comelec an proklamasyon sa nagtrayumpong SK Chairman sa nasambitang barangay makalihis na dae magpabor si Gomez na iagi sana sa toss coin an pag-break sa tie asin hurot kuta na kaini na magkaigwa nin recount.
Napag-araman na an barangay Sta. Cruz na sana an pinakahuring barangay sa ciudad na dae pa nakapagproklamar nin nanggana sa nasambitang posisyon huli sa pangyayari.
