Nagtao nin patanid an Department of Justice sa mga opisyal kan gobyerno asin mga kontratista na imbwelto sa maanomalyang flood control projects.
Pinatanidan mismo kan presenteng sekretaryo kan kagawaran na si Secretary Jesus Crispin ‘Boying’ Remulla an mga ini sa saindang pagkakadawit sa nasambitan ng isyu nin korapsyon. Patanid ni Justice Secretary Remulla posibleng kahampangon kan mga nasasangkot sa kontrobersiya an padusang ‘life imprisonment’ sa oras maisunad na an kaso laban sa mga ini.
Dugang pa kaini, magin an ‘forfeiture’ o pagbawi kan mga ari-arian kaini gikan sa nakamal na kwartang gikan sa pondo kan taumbayan an sainda man na ikinukunsidera. Kaya man pig-inkaminar asin pinagirumdom kan sekretaryo sa mga imbwelto na indibidwal na makipag-kordinar o dagusan ng magtaram dapit sa mga naaaraman katakod sa isyu nin ghost projects.
Enkaso man na ibalik man kan mga kontratista o opisyal kan gobyerno an saindang mga nakuang kwarta, hurot ni Justice Secretary Remulla, maagi pa ini sa masusing mga pagsusuri. Isasairarom an mga ini sa forensics accounting tangani masierto an katotohanan sa saindang mga idineklarang kantidad kan kwarta.
Mientrastanto, positibo man na pigheras kan sekretaryo na an ipinapahiling kaining kawanihan kan National Bureau of Investigation an igwa nin nadidiskubre sa saindang pag-iimbestigar. Kasunod kan pahiruon an Anti-Graft Unit kaini, sigun ki Sec. Remulla, pigheras na sa saiya an nagkapirang findings kan grupo.
An nasambitan ng Anti-Graft Unit kan National Bureau of Investigation iyo an mismong grupo na inatasan kan Department of Justice na matutok sa imbestigasyon katakod sa maanomalyang flood control projects.
Kabali na digde an nagkapirang propesyunal partikular kan mga bihasa sa forensics accounting tangani tawan pokus an pagsusuri sa mga kwartang gikan sa ghost projects. Huli digde, nilalaoman na sa paagi kan ‘findings’ kan kawanihan, makapagsusunad na nin kaukulang kaso an Department of Justice.
Kabali sa mga kasong posibleng isunad iyo an ‘plunder’ asin ‘malversation of public funds’ kontra sa mga opisyal na nakinabang sa kontrobersiya.
Sa presente, mayo pang ibang pigheras an sekretaryo sa kun igwa na nin opisyal an hayagan nagtaram tangani ibalik kaini an kwartang nakamal gikan sa maanomalyang ghost projects kan gobyerno.
