Nag-ulay sinda South Korean Acting President Han Duck-Soo asin President Joe Biden sa sarong phone call makalihis an pag-impeach kan Korean Lawmakers ki President Yoon Suk Yeol.
Digde, ni-reassure ni Acting Prsident Han an mga kaalyadong nasyon kaiba na an Amerika asin pigporbaran ma-stablize an financial markets makalihis na maipasar an impeachment motion kontra sa Presidente kan SoKor.
Inapod man ni Biden an alyansa kaini sa South Korea komo “linchpin for peace” sa rehiyon.
Sa sarong statement man kaining domingo, Disyembre 15, sinaysay ni acting Pres. Han na papairalon kan saindang nasyon an foreign asin security policies kaini nin mayong pagkaantala asin hihingowahon na mamantinir asin mapatatag an alyansa sa tahaw kan SoKor asin Amerika.
Si Han an paramientras na nagsalida ki Pres. Yoon mantang nakabinbin pa an desiyon kan Constitutional Court sa impeachment kan presidente.
Nagin acting president si Han sa bisa kan decree kan konstitusyon kan Seoul.
Mientrastanto, para man ma-stabilize an ekonomiya asin liderato kan South Korea, pig-anunsyar kan pangenot na opposition party na dae kan ii-impeach si Han sa saiyang pag-imbwelto sa martial law declaration ni Yoon kan nakalihis na Disyembre 3.
