Pigluwas na kan South Korean police an rason kan biglaang pagkagadan kan South Korean actress na si Kim Sae Ron sa edad na 24 anyos.
Basado sa report gikan sa Korean media outlets, kinumpirma kan sarong police official sa media sa sarong briefing sa National office of Investigation na nagtutubod sindang naggibo nin extreme choice an aktres asin nagdesisyon na i-handle ini komo suicide.
Sigun sa mga otoridad, mayong winalat na note an aktres sa saiyang harong kun saen ini nadukayan kan saiyang amiga na mayo na nin buhay kan aldaw nin Dominggo, Pebrero 16 asin mayo man soboot nin anuman na sinyales kan foul play.
An namaarama na aktress an bistado komo sarong sikat na child star huli sa mga tumatak na ginampanan o pinagbidahaan kaining roles o karakter sa Korean films asin pirang mga korean drama series.
Alagad biglang nauntok an karera kan aktres sa pag-acting makalihis an kontrobersiyang kinaembweltohan kaini kan ma-convict ini huli sa driving under influence of alcohol kan 2022 asin pinagmulta nin 20 million korean won (KRW) na nagguno nin wala-tuong pagbabatikos sa saiya gikan sa Korean netizen.
Alagad, naireport na basado sa acquintance kan aktres na labi mang nakilhag sa biglang pagkagadan kan aktres, na nagpepreparar soboot ini na mag-come back sa pag-arte nin may bagong pangaran asin pelikula.
Kasuarin sana soboot, pigbago kan aktres an saiyang pangaran komo Kim Ah-im asin natapos na man kaini an filming kan saiyang bagong movie na “Guitar Man” kan Nobiyembre kun saen presenteng nasa post-production an nasambitan ng film, sigun sa report kan Edaily.
